انباء يمنية | كامل الخوداني : للمغتربين ... المتفشخرين . ... .. تشتوا الصدق ولو يزعل مني بعض اصحابي اقسم بالله ان قد تحولتوا يامغتربين لمسخره .. طبعا مش الكل اقصد اللي بيضحكوا ويضحكين عليهم فاعلين وفاعلات الخير .. بالله عليكم مافيش بمناطقكم اسر محتاجه ولا ناس فقراء فتح الله عليكم وتشتوا تعملوا خير ضروري الفشخره بالفيس بوك على شان اللي ترسل لاعنده ينزل منشور يكتب ونشكر فاعل الخير فلان ابن فلان وبالذات لا عاد هي بنت .. خلاص اطبقت عليكم ماعاد فيش محتاجين ولا فقراء باليمن على شان تدخلوا تدوروا بالفيس من هو اللي محتاج .. يا اخي المحتاجين الصدق مابيدوروش ناس ينزلوا صورهم ونداء استغاثه لمساعدتهم به مئات الالاف من الاسر المحتاجه مش لاقيين ايش ياكلوا صدق وعفتهم تمنعهم يطلبوا او يتسولوا واراهن ان الكثير من اللي بيدخلوا يتفشخروا ويرسلوا مساعدات للناشطين والناشطات بالذات اذا عاد كلمها وسمع صوتها او شاف صوره ليدها بالفيس وهي منقشه ما واحد منهم قد عمل رساله لقريبه او لصاحبه او لواحد من قريته او من معاريفه يقول له ايش حاجتك او شل لك هذه مصاريف انت وجهالك اذا هو عارف ان حالته متعبه ... تحول الفيس بوك لشبكات مثل العصابه ينتشروا على الحارات والمناطق يصورو حالات المساكين والامراض والمحتاجين ونزلوا المنشورات يافاعلين الخير واتصلوا على هذا الرقم رقم شخص ثاني من العصابه نفسها .. يافاعلين الخير وهات ياصور ومنشورات وفيديوهات والخبير تقتله العاطفه وقام يرسل وبالاخير قد معاهم سيارات وبيوت واخر حاجه فضائح بالفيس بوك .. يامغتربين ازعلوا والا اخبطوا راسكم بالجدر خلاص ما عاد فيش مساكين ولا محتاجين باليمن ولا بمناطقكم ولا تشوفوا اشخاص امينين تعرفوهم تقولو لهم شوف اذا به اسر محتاجه كلمتني وبيلاقي بمنطقته او حارته الف اسره تستحق فعل الخير صدق واسر عفيفه مش مطلبه .. كل هذا على شان ينزلوا لكم منشور يقولوا نشكر فاعل الخير ويذكروا اساميكم وانتوا تفرحوا .. هذه اسمها فشخره مش عمل خير فشخررره .. واحده تبكر تنزل اغاني للمغتربين وتمكنهم صباح الخير يامغتربين هيا صبوح شفوت وملوح وتنزل جنبها صورة يدها وهي منقشه وهم يطير شعر روسهم .. ناشطات وناشطين قد معاهم سيارات وعمارات وطالبين الله مت ظهوركم انتوا وفعل الخير حقكم قصدي الفشخره .. كل واحد يشوف منطقته ويشوف اسرته ويشوف اصحابه ويشوف اللي يعرفهم وبيلاقي الف اسره محتاجه وتستحق فعل الخير احنا والفشخره حقكم هذه .. شبكات نصب نسوان ورجال بإسم فعل الخير والسلال الغذائيه وعلاج الامراض والمحتاجين قد معاهم سيارات وبيوت من ظهوركم اشتحطوا خسف الله بكم خلاص مافيش محتاجين لو الواحد منكم يدخل بس قائمة اصدقائه منكم بيلاقي نصف اللي بيعلقوا ويضحكوا عنده ويفتكرهم مبسوطين مش لاقيين ايش ياكلوا داخل بيوتهم بس ناس عفيفين شرفاء لايمكن يطلبك لو يموت جوع شوف المغتربين اللي جنبك اذا انت بالسعوديه بتلاقي نصهم بحاجة الريال وشاقي الواحد على اربع اسر واذا انت بإمريكا والفلوس كثير شوف اللي تغرفهم واصحابك وابناء منطقتك وكلم شخص ثقه يشوف الاسر اللي بمنطقته او مدينته ومحتاجين صدق وهم عفيفين او معاهم مرض مش لاقيين ايش يعالجوا مريضهم وهو يكلمك اذا انت حق فعل خير بدل ما جالسات شله نصابات ونصابين يضحكين عليكم ويافاعلين الخير وشكرا لفاعل الخير زعطان ابن فلتان ... وسلامتكم ..

للمغتربين ... المتفشخرين . ... .. تشتوا الصدق ولو يزعل مني بعض اصحابي اقسم بالله ان قد تحولتوا يامغتربين لمسخره .. طبعا مش الكل اقصد اللي بيضحكوا ويضحكين عليهم فاعلين وفاعلات الخير .. بالله عليكم مافيش >>

كامل الخوداني | مدونون | 07:40 2020/05/08 | 1225 قراءة

لقراءة المنشور كاملاً انقر على رابط المصدر >> كامل الخوداني

| خبر صحيح | 0

| خبر غير صحيح | 0